| has gloss | szl: Murcki (mjym. Emanuelssegen) to je dźelńica Katowic pouožůno we pouedńowyj tajli mjasta. Zajmuje 44,8 km² placu a pomjyškuje sam ůng. 6000 ludźi. Nojstaršo powjarka s terynu kaj terozki sům Murcki je uo placu mjanowanym Śůngarńo. Podug powjarki, w čos jak św. Klymyns, školoř Cyryla a Metodygo chrystjańizowou ta źymja, we Śůngarńe cichtowoua na jygo žyće heksa. Murcki to je jydyn s placůw, kaj nojwčeśńij kopano wůngel, skiž tygo, co kajńikaj wylazuje uůn aže na zol. S takigo placu, uo mjańy Rudne Kotliska dobywano go we lotach 50. XVII wjeka. Bewajsym na dobywańy sam wůnglo je šrajbowańy we kśyngach pščyńskich ze 1657 roka. We 1769 uruchomjůno sam pjyršo gruba pode majnym Emanuelssegen. Wele ńij začua śe rozwijać uosada, zalůnžek uobecnych Murckůw. We 1852 ku grubje doprowadzůno bočńica banowo, a we 1863 - prywatno drůga s Kobjůra do Murckůw bez Tychy. Po abštimůngu přiuůnčuno Murcki ku Polsce we 1921 roku. We lotach 1967-1975 bůuo to samodźelne mjasto, ńyskoři přiuůnčůne do Katowic. |
