| has gloss | mhr: Сӱан лупш - осал койыш-шоктышым, шонымашым почкалтарыше, ӱдыр ден качым, сӱан калыкым аралыше ӱзгар. Марий сӱан кышкарыште кугезына-влакын тÿня, сандалык нерген умылымашышт аралалтеш. Тыште кажне сӱанмарий, сӱанвате ты тӱняумылымашым шыҥдарымаште шке сомылжым шукта. Сӱанвуй (онаеҥ) у ешлан пиалым, поро пӱрымашым, аралтышым йодеш. Савуш сӱан йӱла шот дене, радам дене шукталтмым эскера. Тыгодым сӱан калыкын койыш-шоктышыжланат вуйын шога. Арам огыл тудын кидыштыже – сӱан лупш. Сӱан лупш, кудо тӱмырым пералтыме, шӱвырым пуалме йӱк дене тӧр оҥгыр рӱзалт йоҥгалтеш, калык чӱчкен-мурен шогымо годым вуй ӱмбалне шонанпыл тӱс дене йолген волгалтеш. Тыге тудо йырым-ваш поро шӱлышым шара, осал юапым покта. Лупш сӱанмарийым уло кумыл дене кушташ, сӱанватым чӱчкаш таратен. Сӱан калыкын сурт гыч суртыш коштмо корныштымат, ӱдыр-качын пӱрымаш деке эртышаш ошкылыштымат сӱанвуй лупш ден почкалтарен аруэштарен. Нылле ик тушманым тошкалын, нылле ик порылыкым налын, сӱан лупш ончыкылык илышлан сото корным почын. |